日期: 7/4/2005

地點: 擔杆

時間: 9:00am – 8:00pm

出席會員: Eddie、輝哥、Ken、Michael、牛、爭爆

好耐無上擔頭，適逢 2-3 級微風，一於上三牙搏一舖﹝出水石側斜排﹞。Ken 先拔頭籌中斤頭白立，而我就專攻久別了的紅尾東。

後來阿Ken發現兩竿外四尋半有雞魚蹤跡，一到線檔即中，於是馬上轉釣組夾攻雞魚。雖然 SIZE 不出磅頭，亦過足手癮，好耐無見過咁清晰兼且密的魚訊喇!

中午過後，魚訊消失，只剩低雀鯛消餌，於是疊埋心水劏魚。

四點三左右，阿Ken正在準備下半場的誘餌，而我就死磨，週圍刮魚，試試拋去左邊三四竿出水石個邊，不久就見浮波下沉。一抽之下馬上出DRAG，先游向右、再向左、向出、向下、貼腳邊，乜都試過晒。都唔知對方係咩料，只見1.5號 VR 完全滿弓，出DRAG無數次，心知絕非等閒之輩，5、6斤應該走唔甩，惟有不停打8字......  ﹝好在用緊 4 號布 + 4 號腳，都定D﹞

﹝唔知邊處吹來D風，竟然話蒲苔最近有人釣到石倉，唔係牙話，夏天都未到......不過唔通今舖真係?...HeHe
不過條魚又無石倉游得咁快......敢唔通係大白立......又無咁好耐力架......咁即係乜？......細鱗??﹞

由於釣棚係四尋半，加上魚力無窮，過了五分鐘才驟見一個白餅影，起初以為真係白立，阿Ken就話好似係黃立倉。正呀！以前曾經目睹阿Ken中雙黃立倉，一味得個恨字，今次仲唔輪到我！

條魚真係好耐力，在一尋半水深處不停游左游右，點都唔肯就範。聽聞話黃立倉游到腳邊時會再發力爭札游翻出去，所以又唔敢鎖個DRAG太死。

好累......出埋肚頂......最後終於上到水面。阿Ken幫手撈魚，因50cm撈箕網稍淺，第一次撈跌翻出黎，第二次勉強OK。後尾聽阿Ken講應該玩左約 10 分鐘左右。

過磅後證實為 9 斤 7 兩﹝長約 73 cm﹞，亦係個人最佳紀錄。

至於Eddie、輝哥、牛、掙爆亦收到白立、幽面、石蚌、雞魚、紅尾東等。

 

 
﹝早上潛得，唔知係乜魚，近尾部有白色倒刺，約 8 兩，已放生﹞

﹝阿Ken於22/7/2004中雙黃立倉﹞